ન્યૂયોર્કઃ અમેરિકાને વિશ્વનો સૌથી અમીર દેશ ગણવામાં આવે છે. અમેરિકાને વિશ્વનો સૌથી શક્તિશાળી દેશ કહેવામાં આવે છે. આ દેશ મની પાવર અને મિલિટરી પાવર બંને મામલે ટોપ પર છે, પરંતુ તમને જાણીને નવાઈ લાગશે કે આ દેશના સૌથી પ્રખ્યાત શહેર ન્યૂયોર્કમાં બેઘર લોકોની સંખ્યા ઝડપથી વધી રહી છે.
તાજેતરમાં એક અહેવાલમાં જણાવવામાં આવ્યું છે કે ન્યુયોર્કના શેલ્ટર હાઉસ પર બોજ નોંધપાત્ર રીતે વધી ગયો છે કારણ કે શહેરમાં બેઘર લોકોની સંખ્યા 1,00,000ને વટાવી ગઈ છે.
ઈતિહાસમાં આ પ્રથમ વખત બન્યું છે કે રાત્રિ આશ્રયસ્થાનોમાં લોકોની સંખ્યા આટલા સ્તરે પહોંચી ગઇ છે અને વહીવટીતંત્રે શહેરમાં વધતા બેઘરનું કારણ સ્થળાંતર કરનારાઓને ગણાવ્યું છે. સ્થાનિક વહીવટીતંત્ર ન્યૂયોર્ક શહેરમાં મોટી સંખ્યામાં બેઘર લોકોના મુદ્દાને લઈને ચિંતિત છે અને સૌથી ચિંતાજનક બાબત એ છે કે આ સંખ્યા ઝડપથી વધી રહી છે.
એક અહેવાલમાં જણાવાયું છે કે થોડા દિવસો પહેલા આશ્રયસ્થાનોમાં સ્થળાંતર કરનારાઓની સંખ્યા 50,000 ને વટાવી ગઈ હતી, અને ન્યૂયોર્ક સિટીના ડેપ્યુટી મેયરના જણાવ્યા અનુસાર, આ લોકોમાંથી લગભગ બે તૃતીયાંશ બાળકો સાથેના પરિવારો છે.
ન્યૂયોર્ક સિટીમાં પ્રાથમિક મ્યુનિસિપલ આશ્રય પ્રણાલીમાં ડિસેમ્બર 2022 દરમિયાન કુલ 68,884 વ્યક્તિઓને સમાવી લેવામાં આવી હતી, જેમાંથી 21,805 કાયમી આવાસ વિનાના બાળકો હતા. આ ઉપરાંત ત્યાં 22,720 એકલ પુખ્ત વયના લોકો હતા જેમણે દરરોજ રાત્રે આશ્રય મેળવ્યો હતો.
એક સંસ્થાએ જણાવ્યું હતું કે દરરોજ રાત્રે મ્યુનિસિપલ આશ્રયસ્થાનોમાં સૂતા બેઘર ન્યૂયોર્કવાસીઓની સંખ્યા હવે 10 વર્ષ પહેલાંની સરખામણીમાં 39 ટકા વધારે છે. રિપોર્ટ અનુસાર, 2022માં ન્યૂયોર્કમાં સ્થળાંતર કરનારા લોકોના આગમન બાદથી તેમને આવાસ આપવા માટે $1 બિલિયનથી વધુનું ફંડ ફાળવવામાં આવ્યું છે. એવો અંદાજ છે કે આવતા વર્ષ સુધીમાં આ રકમ $4 બિલિયનને વટાવી જશે.
