અલાસ્કામાં ભૂકંપના જોરદાર આંચકા:રિક્ટર સ્કેલ પર 7.4 તીવ્રતા

અલાસ્કાઃ અમેરિકાના અલાસ્કામાં ભૂકંપના આંચકા અનુભવાયા છે. રિક્ટર સ્કેલ પર ભૂકંપની તીવ્રતા 7.4 હતી. અમેરિકાની સુનામી વોર્નિંગ સિસ્ટમે પણ એલર્ટ જાહેર કર્યું છે. યુનાઇટેડ સ્ટેટ્સ જિયોલોજિકલ સર્વે અનુસાર, ભૂકંપનું કેન્દ્ર જમીનથી 9.3 કિમીની ઊંડાઇએ હતું.
અલાસ્કામાં ભૂકંપનો એક વીડિયો પણ સોશિયલ મીડિયા પર ઝડપથી વાયરલ થઈ રહ્યો છે. આમાં અલાસ્કાના એક ઘરમાં ભૂકંપની અસર જોવા મળી શકે છે. વીડિયોમાં જોરદાર આંચકા વચ્ચે એક પિતા પોતાનાં બાળકો સાથે દોડતા જોવા મળે છે. તે પહેલાં પોતાના એક બાળકને ખોળામાં લઈને ભાગી જાય છે. આ દરમિયાન ઉતાવળમાં બીજી દીકરીનો હાથ છૂટી જાય છે. આ પછી તે તરત જ પાછા આવે છે અને ઝડપથી તેને પણ લઈને રૂમમાંથી નીકળી જાય છે.
2 વર્ષ પહેલાં 2021માં પણ અલાસ્કામાં 8.2ની તીવ્રતાનો ભૂકંપ આવ્યો હતો. યુનાઇટેડ સ્ટેટ્સ જિયોલોજિકલ સર્વે (યુએસજીએસ)એ ત્યારે પણ સુનામીની ચેતવણી જારી કરી હતી. જોકે આનાથી કોઈ નુકસાન થયું નથી. 2020માં પણ અલાસ્કાના દક્ષિણ કિનારે 7.5 તીવ્રતાના ભૂકંપને કારણે સુનામીનાં મોજાઓ આવ્યાં હતાં, પરંતુ કોઈ જાનહાનિ થઈ ન હતી.
અગાઉ માર્ચ 1964માં અલાસ્કામાં જોરદાર ભૂકંપ આવ્યો હતો. તેની તીવ્રતા 9.2 હતી. તે ઉત્તર અમેરિકામાં અત્યાર સુધીનો સૌથી વિનાશક ધરતીકંપ હતો. આ ઉપરાંત, સુનામીએ અલાસ્કાના અખાત, અમેરિકાના પશ્ચિમ કિનારે અને હવાઈને ભારે નુકસાન પહોંચાડ્યું હતું. ભૂકંપ અને સુનામીને કારણે 250થી વધુ લોકો માર્યા ગયા હતા.
ધ રિંગ ઓફ ફાયર એક એવો વિસ્તાર છે જ્યાં અનેક ખંડીય તેમજ સમુદ્રી ટેકટોનિક પ્લેટો છે. જ્યારે આ પ્લેટો એકબીજા સાથે અથડાય છે, ત્યારે ભૂકંપ આવે છે, સુનામી ઉત્પન્ન થાય છે અને જ્વાળામુખી ફાટી નીકળે છે. આ રિંગ ઓફ ફાયરની અસર ન્યુઝીલેન્ડથી લઈને જાપાન, અલાસ્કા અને ઉત્તર અને દક્ષિણ અમેરિકા સુધી જોઈ શકાય છે. વિશ્વના 90 ટકા ધરતીકંપો અને 78 ટકા સુનામી આ રિંગ ઓફ ફાયર રિજનમાં થાય છે.
આ વિસ્તાર 40 હજાર કિલોમીટરમાં ફેલાયેલો છે. વિશ્વના 75 ટકા સક્રિય જ્વાળામુખી આ પ્રદેશમાં છે. રિંગ ઓફ ફાયરની અસર 15 દેશોમાં છે, જાપાન, રશિયા, ફિલિપાઇન્સ, ઇન્ડોનેશિયા, ન્યુઝીલેન્ડ, એન્ટાર્કટિકા, કેનેડા, યુએસએ, મેક્સિકો, ગ્વાટેમાલા, કોસ્ટા રિકા, પેરુ, એક્વાડોર, ચિલી અને બોલિવિયાનો સમાવેશ થાય છે.