જમ્મુ-કાશ્મીરઃ જમ્મુમાં ચાર દિવસથી રોકાયેલી અમરનાથ યાત્રા ફરી શરૂ થઈ હતી. 7,800થી વધુ યાત્રીઓની 10મી ટુકડી કડક સુરક્ષા વચ્ચે બેઝ કેમ્પમાંથી નીકળી હતી. તેમાં બાલતાલ અને પહેલગામ બંને રૂટના મુસાફરોનો સમાવેશ થતો હતો. ગત દિવસોમાં રામબન સેક્શનમાં ભૂસ્ખલન થતાં નેશનલ હાઇવે બંધ કરી દેવામાં આવ્યો હતો. તેના સમારકામ બાદ યાત્રા ફરી શરૂ થઈ. અધિકારીઓના જણાવ્યા અનુસાર, અત્યાર સુધીમાં કુલ 1.37 લાખ શ્રદ્ધાળુઓ બાબા અમરનાથના દર્શન કરી ચૂક્યા છે.
કેલિફોર્નિયાથી બે અમેરિકન નાગરિકો અમરનાથ યાત્રા કરવા જમ્મુ-કાશ્મીર પહોંચ્યા હતા. તેનો વીડિયો અમરનાથ શ્રાઈન બોર્ડે શેર કર્યો હતો. આ નાગરિકો કહે છે કે સ્વામી વિવેકાનંદ અમરનાથ આવ્યા હતા, તેમને અદભુત અનુભવ થયો હતો. હું આ વાર્તા 40 વર્ષથી જાણું છું. અહીં આવવું અશક્ય લાગતું હતું. તે એક સ્વપ્ન જેવું હતું. પરંતુ ભોલેનાથની કૃપાથી બધું એકસાથે થયું અને અહીં અમે છીએ. અમને કેવું લાગે છે તે અમે કહી શકતા નથી. દક્ષિણ કાશ્મીર હિમાલયમાં 3,888 મીટર ઊંચી ગુફા મંદિરની 62-દિવસીય યાત્રા 1 જુલાઈના રોજ અનંતનાગના પહેલગામ અને ગાંદરબલના બાલતાલથી શરૂ થઈ હતી. આ યાત્રા 31 ઓગસ્ટ એટલે કે રક્ષાબંધન સુધી ચાલશે. જેનું સમાપન છડી મુબારક સાથે થશે.
