સીડનીઃ ઈંગ્લેન્ડમાં ફરી એકવાર ભારતીય ટીમનું વર્લ્ડ ચેમ્પિયન બનવાનું સપનું ચકનાચૂર થઈ ગયું. ઓસ્ટ્રેલિયા ઓવલમાં ભારતીય ટીમને ૨૦૯ રને હરાવીને પ્રથમ વખત ટેસ્ટમાં વર્લ્ડ ચેમ્પિયન બન્યુ છે. આ સાથે, તે વન્ડે 20-20 અને ટેસ્ટ એટલે કે આંતરરાષ્ટ્રીય ક્રિકેટના તમામ ફોર્મેટમાં વર્લ્ડ ચેમ્પિયનશિપ જીતનારી પ્રથમ ટીમ બની ગઈ છે. ભારતે અંતિમ દિવસે ૫ વિકેટ બાકી રહેતા ૨૮૦ રન બનાવ્યા હતા, પરંતુ વિરાટ કોહલી અને જાડેજા એક જ ઓવરમાં શિકાર બન્યા હતા અને તે પછી ભારતીય ક્રિકેટ ટીમનું સપનું ચકનાચૂર થઈ ગયું હતું. છેલ્લી વખત ભારતને ન્યુઝીલેન્ડ દ્વારા ઈંગ્લેન્ડમાં જ હાર મળી હતી.
ઐતિહાસિક ટેસ્ટના ચોથા દિવસે ભારતીય ટીમે ૩ વિકેટે ૧૬૪ રન બનાવ્યા હતા. અજિંકય રહાણે અનેે વિરાટ કોહલી આજે ફરી રમવા ઉતર્યા હતા. ૫ દિવસની રમત શરૂ થઈ ત્યારે ભારતને ૨૮૦ રનની જરૂર હતી, જ્યારે ઓસ્ટ્રેલિયાએ ૪૪૪ રનનો વિશાળ લક્ષ્યાંક રાખ્યો હતો. છેલ્લા દિવસે સમય પુષ્કળ હતો અને ભારતની ૭ વિકેટ હાથમાં હતી, એવી અપેક્ષા હતી કે ભૂતપૂર્વ કેપ્ટન અને ભૂતપૂર્વ વાઇસ-કેપ્ટન જોડી વિરાટ કોહલી અને રહાણે થોડો કરિશ્મા ખેંચશે, પરંતુ તેમ થયું નહીં.
રોહિત શર્માએ ચોથી ઇનિંગમાં સારી શરૂઆત કરી હતી પરંતુ તે ૪૩ રન બનાવીને આઉટ થયો હતો. તેની પહેલા શુભમન ગિલ એક વિવાદાસ્પદ નિર્ણયનો શિકાર બન્યો હતો. ગીલ માત્ર ૧૮ રન પર જ આઉટ થયો હતો, જ્યારે પૂજારાએ ખરાબ શોટ રમ્યો હતો અને તે ૨૭ રન બનાવીને આઉટ થયો હતો. આ રીતે ૩ વિકેટ પડી હતી. પાંચમા દિવસે ભારતની પ્રથમ વિકેટ વિરાટ કોહલીની પડી હતી. તે ૪૯ રનના સ્કોર પર બોલેન્ડની બોલ પર કેચ આઉટ થયો હતો. બીજી સ્લિપમાં સ્ટીવ સ્મિથે હવામાં ડાઇવ કરીને કેચ પકડયો હતો. એ જ ઓવરમાં રવિન્દ્ર જાડેજા પણ શૂન્ય રન પર આઉટ થયો હતો. જ્યારે બોલેન્ડ પછી સ્ટાર્કે આગેવાની લીધી, અજિંકય રહાણેને વિકેટકીપર એલેક્સ કેરીના હાથે કેચ આઉટ કરાવ્યો, ત્યારે ભારતની સાચી આશાઓ પર પણ પાણી ફરી વળ્યું. તે ૪૬ રન બનાવીને આઉટ થયો હતો. આ પછી શાર્દુલ ઠાકુર ખાતું ખોલાવ્યા વિના નાથન લિયોનનો શિકાર બન્યો, જ્યારે ઉમેશ યાદવ એક રન બનાવી સ્ટાર્કના બોલ પર કેરીના હાથે કેચ આઉટ થયો. આ પછી શ્રીકર ભરત (૨૩) અને મોહમ્મદ સિરાજે નાથન લિયોનને આઉટ કરીને ઓસ્ટ્રેલિયાને વર્લ્ડ ચેમ્પિયન બનાવ્યું હતું. ભારતનો બીજો દાવ ૨૩૪ રનમાં સમેટાઈ ગયો હતો.
