કેનેડાઃ કેનેડા બોર્ડર સિક્યોરિટી એજન્સીએ કેનેડામાં રહીને અભ્યાસ કરી રહેલા ભારતીય વિદ્યાર્થીઓને મોટો આંચકો આપ્યો છે. 700 જેટલા ભારતીય વિદ્યાર્થીઓને કેનેડા બોર્ડર સિક્યોરિટી દ્વારા ડિપોટેશનની નોટિસ ફટકારીને તેમને થોડા જ દિવસમાં કેનેડા છોડવાનો આદેશ આપ્યો છે. આ બાબતે એવું જણાવવામાં આવી રહ્યું છે કે આ વિદ્યાર્થીઓએ જલંધરની એક એજન્સી એજ્યુકેશન માઈગ્રેશન દ્વારા કેનેડાના સ્ટડી વિઝા લીધા હતા, કેનેડામાં આ પ્રકારના એજ્યુકેશન ફ્રોડનો આ પહેલો મામલો છે. આ વિદ્યાર્થીઓએ કેનેડામાં પોતાનો અભ્યાસ પૂર્ણ કર્યો હતો, પરંતુ જ્યારે તેઓએ પીઆર માટે અરજી કરી હતી ત્યારે તપાસમાં તેમના દસ્તાવેજો બનાવટી હોવાનું જાણવા મળ્યું હતું. મહત્વની વાત તો એ છે કે આ જ દસ્તાવેજોના આધારે આ વિદ્યાર્થીઓને માત્ર કેનેડાના વિઝા જ નહીં પણ કેનેડાની કોલેજમાં એડમિશન પણ આપવામાં આવ્યું હતું. એજ્યુકેશન માઈગ્રેશન સર્વિસ એજન્સી ચલાવતા બ્રિજેશ મિશ્રા નામના વ્યક્તિએ આ વિદ્યાર્થીઓ સાથે છેતરપિંડી કરી હતી. આ બધા વિદ્યાર્થીઓએ બ્રિજેશ મિશ્રા દ્વારા જ સ્ટડી વિઝા માટે અરજી કરી હતી. એટલું જ નહીં પણ મિશ્રાએ આ તમામ 700 વિદ્યાર્થીઓ પાસેથી આ માટે 16-16 લાખ રૂપિયા લીધા હોવાનું પણ જાણવા મળ્યું હતું. બ્રિજેશ મિશ્રાએ ચાલાકીથી આ તમામ વિદ્યાર્થીઓના દસ્તાવેજો પર સહી કરાવી લીધી હતી, પરંતુ પોતે સહી કરી નહોતી. એટલા માટે કેનેડિયન એજન્સીઓ આ વાત સ્વીકારતી નથી, પરંતુ વિદ્યાર્થીઓનું કહેવું છે કે તેઓ આ વિશે કંઈ જ જાણતા નથી.
