નવી દિલ્હીઃ ઍક ફોટોગ્રાફર વિશે નવલકથા ‘ધ સેવન મૂન્સ અોફ માલી અલ્મેડા’ લખવા માટે શ્રીલંકાના લેખક શેહાન કરૂણાતિલાકાને બુકર પુરસ્કાર મળ્યો. ઍક રિપોર્ટ મુજબ, આ સમયગાળા દરમિયાન કરૂણાતિલકાને અંગ્રેજી ભાષાનો સાહિત્યિક પુરસ્કાર તેમજ કવિન કન્સોર્ટ કૈમીલા તરફથી ટ્રોફી સહિત ૫૦,૦૦૦ પાઉન્ડનો પુરસ્કાર પણ મળ્યો. કરૂણાતિલાકાની આ નવલકથા શ્રીલંકામાં ૧૯૯૦ દરમિયાન ચાલી રહેલા દેશના ગૃહયુદ્ધમાં સમલૈંગિક યુદ્ધ ફોટોગ્રાફર અને જુગારી માલી અલ્મેડા વિશે છે. બુકર પુરસ્કારમાં દાવેદારોની આ વર્ષના શોર્ટલિસ્ટમાં બ્રિટિશ લેખક ઍલન ગાર્નરની ટ્રેકલ વોકર, જિમ્બાબ્વેના લેખક નોવીયોલેટ બુલાવાયોની ગ્લોરી, આયરિશ લેખક ક્લેયર કિગનની સ્મોલ થિંગ્સ લાઈક ધીસ, અમેરિકાના લેખક પારસીવાલ ઍવરેટની ધ ટ્રીજ પણ હતી. કરૂણાતિલકાના પુસ્તક વિશે, ન્યાયાધીશોના પ્રમુખ નીલ મૈકગ્રેગરે જણાવ્યું હતું કે, તે ઍક આધ્યાત્મિક થ્રિલર છે, ફક્ત વિભિન્ન શૈલીઓની, જીવન, મૃત્યુ, શરીર અને આત્માની વાતોથી વણાયેલી નવલકથા છે.
